Eskerrik asko, bihotzez!

Eskerrik asko, bihotzez!

COVID-19rekin lotutako alarma-egoeraren ondorioz sortutako krisiak ziurgabetasunez betetako paradigma berri batera garamatza, baina baita erronketara ere. Albert Einsteinek zioen bezala, “Krisirik gabe ez dago erronkarik”. Artelatz Ingurumen Zerbitzuak SL ez da bakarrik sentitzen erronka horiei aurre egiten. Buletin honetan, eskerrak eman nahi dizkizuegu gertu egoteagatik eta beste behin ere gure taldean konfiantza izateagatik. Ziur gaude elkarrekin indartsuago aterako garela krisi honetatik, Albert Einstein berriz ere parafreaseatuz Krisia gainditzen duenak bere burua gainditzen du “gaindituta” geratu gabe. Eskerrik asko, bihotzez.

Mitologiaz gozatzen Anduetza eta Arantzazu parketxeetan

Mitologiaz gozatzen Anduetza eta Arantzazu parketxeetan

Azaroko azken igandean eta abenduko lehenengoan, Zegamako Anduetza Parketxean eta Oñatiko Arantzazu Parketxean Marimundukoren ipuin harrigarriak ezagutzeko aukera izan zen. Orain arte urtero ibili izan da pertsonai maitatua Ataungo Barandiaran museoan eta Zegaman kondaira zirraragarriak kontatzen baina aurten estreinekoz izan da Arantzazun.

Pertsonaia mitologikoen laguntzaz, sorginen amak Euskal Herriko hainbat ipuin eta kondaira kontatu zizkien bertaratutako guztiei eta 4 emanaldiak lepo bete ziren, saio oso arrakastatsuak izanik. Parte-hartzaile guztiek asko gozatu zuten euskal kondairak entzuten eta bertatik bertara ikusten.

Mitologia, ipuin edo kontu fantastiko sorta ez ezik, errealitatea esplikatzen duten argibideen multzoa da. Gertakari naturalei aurre egiteko nahiz euren buruak lasaitzeko, mitoak herritarrei ingurunea ulertzen lagundu dien lanabesa izan dira mendeetan zehar. Ataunen Joxe Migel Barandiaranek lan handia egin zuen mitologiaren transmisio soka eten ez zedin eta Jentilbaratza elkarteak lan horri eutsi nahi izan dio emanaldi bikain hauek Aizkorri-Aratzeko parketxeetan eskainiz.

Marimundukok esan bezala, jarrai dezagun gure haurrei euskal mitologiako kondairak kontatzen eta hala bazan eta ez bazan… sar dadila kalabazan eta atera dadila …

Leizarrate, antzezpen musikatua Zegaman

Leizarrate, antzezpen musikatua Zegaman

Zegamako Udalak, “Leizarrate, antzezpen musikatua” antolatu du, urriaren 27an, igandearekin, Gipuzkoako Foru Aldundiaren Kultura departamentuaren laguntzaz. Urrup Antzerki Taldeak burutuko duen antzezpen honen bitartez, Aizkorriko bidean, Leizarrate harkaiztia zeharkatzeko ezinbestekoa den San Adrian tunelaren historia ezagutzera emango da (UNESCO-k Gizateriaren Ondare izendatu zuen gune hau).

Biztanle ugari izan ditu historian zehar tunel berezi honek. Batzuk, bere barnean bizi izan dira, beste batzuk bertatik igaro izan dira errege bidetik oinez… Pertsonaia guzti hauen bizipenak antzeztuko dira San Adrian tunelean, bertatik bertara eta kobak eskaintzen duen giro misteriotsuan iraganera salto egingo delarik.

Emanaldi bakarra izango da aforo mugatuarekin. Doakoa bada ere, nahitaezkoa da aurre erreserba egitea Anduetza Parketxearekin harremanetan jarriz (943 80 21 87, anduetza@gipuzkoamendizmendi.net). Hitzordua goizeko 11:00tan izango da Aldaola aparkalekuan, Otzaurtetik 4km-ra. Ondoren, San Adrian tunelera gida batekin oinez joango dira bisitariak antzezpena 12:00tan izango delarik.

Udan nora? Parketxeetara, makina bat jarduera aukeran

Udan nora? Parketxeetara, makina bat jarduera aukeran

Uda ere garai oso aproposa da inguruan ditugun natur eremuak ezagutzeko eta horretarako, Parketxeek makina bat aukera proposatzen dituzte uda honetarako:

Aralarko lur azpia ezagutu nahi?

Larunbat honetan, uztailak 4, espeleologia ibilaldia egingo da Aralarren, Akaitz Txiki II kobara. Lur azpiak gordetzen dituen sekretuak ezagutu nahi badituzu, zatoz Felix Ugarte espeleologoen eskutik egingo den ibilaldira. Plazak mugatuak dira, beraz, ez galdu denbora gehiago eta deitu 943 18 03 35 telefonora izena emateko!

Eta hori gutxi balitz, uztailaren 11ean IV. Gau ibilaldi mitologikoa Ataunen ospatuko da, “Gaua gauezkoentzat” Jentilbaratza Kultur Elkartearen eskutik.

Arditurri Eguna berrikuntzaz betea

Arditurriko meategietan, Oiartzunen, urteko egunik bereziena izango da uztailaren 12a, IV. Arditurri Eguna antolatuko baita. Egitarau zabala bezain interesgarria eskainiko da bertako meategiak eta bere historia ezagutzera emateko

  • Meategiak prezio murriztuan.
  • Mertxe Urteaga adituaren eskutik erromatar galeri berriarekin lotutako ibilaldi berezi bat.
  • Bizi Arkeologia Esperientzia: Historiaurreko gizakiak nola lan egiten zuten hurbiletik ikusi eta ikasi ahal izango da tailer anitzen bitartez.
  • Haur jolasak Abaraxka Ludotekaren eskutik

Udako “abenturak” Listorretan!

Listorretako atsedenlekuak gordetzen dituen altxorrak ezagutzeko aukera duzue uda honetan antolatu diren jarduera ezberdinen bitartez:

  • Saguzarrak ezagutzeko ibilaldia Kiko Alvarez-en eskutik
  • Kobak barnetik ikusi eta ulertzeko aukera Felix Ugarte Espeleologia Elkartearekin
  • Aizpitarteko Lagunak Elkartearekin aitzinako gizakien bizimodua ezagutzeko tailerrak

Izena emateko: 943 49 45 21 / 943 49 50 69 arditurri@gipuzkoamendizmendi.net

Uztaila eta abuztuan Anduetza Parketxea zabalik

Asteartetik igandera zabalik egongo da Zegaman kokatzen den Anduetza Parketxea. Irteera interesgarriak prestatu dira Aizkorri-Aratz natura parkeak gordetzen duen ondare kulturala ezaguztera emateko, bseteak beste: Oltzako saroira ibilaldia eta San Adriango indusketa arkeologikoak ezagutzeko ibilaldia.

Informazio gehiago: 943 80 21 87 / anduetza@gipuzkoamendizmendi.net

Nolako txoria halako kabia kanpaina garatzen ari gara

Nolako txoria halako kabia kanpaina garatzen ari gara

Aurreko urteetan Sasietako Mankomunitateak hasitako ingurumen hezkuntzako lanari jarraituz, aurtengoan ere mankomunitatea osatzen duten udalerrietako ikastetxeetara jo dugu birziklapena aitzakiatzat hartuz. Artelatzeko hezitzaileek eramaten ari dira kanpainaren gidaritza, koordinazioa eta dinamizazioa.

NOLAKO TXORIA, HALAKO KABIA leloa duen kanpaina bi lelotan burutzen ari da,  Lehen Hezkuntzako 3. Zikloan eta DBHko 3. eta 4. mailatan; guztira, 1300 ikasle baino gehiago ari dira bertan parte hartzen. Azpimarratzekoa da, ikastetxeen aldetik parte hartzea % 100 izaten ari dela.  Hori horrela, Lehen Hezkuntzan ikastetxeak aukeratzen duen mailako gela guztiekin 3 saio ezberdin burutzen dira. Bigarren Hezkuntzan berriz, ordu eta erdiko  tailer bat garatzen da aukeratutako mailako gela bakoitzean. Saioak ikastetxeetan bertan burutzen dira, Artelatz lantaldeko kideak ikastetxeetara bertaratzen baitira.