Abe 1, 2016 | Hondakinak, Ingurumen hezkuntza
Aurten azaroaren 19tik 26ra ospatu den hondakinak prebenitzeko Europako astearekin bat eginda, hondakinen sorreran murrizketa, gaikako bilketa eta birziklapena sustatzeko hainbat ekintza burutu ditu Artelatzek.
Gasteizen, lau hezitzaile joan-etorri gehien duten kaleetan zehar ibili dira, kanpainako mezuak zituzten biniloz apaindutako edukiontzi eta banderatxoak eramanda, modu honetan hiritarrak gaikako bilketa eta birziklapenean modu egokian eta ahalik eta gehien parte hartzera animatuz. 4.800 harreman baino gehiago lortu dira.
Basaurin birziklapenaren alde bi saio gauzatu dira, non panel eta jolas parte-hartzaileez hornitutako bi triziklo udalerritik zehar ibili diren. Proposatutako jolasetan 423 pertsonatik gora hartu du parte.
Santurtzin, karpa puzgarri batez osatutako informazio puntu baten inguruko bi saio egin dira, Parte-hartze oso handia izan dute bi saioek, zeinetan egin diren jolas, tailer eta zozketek harrera handia izan duten. Gainera, birziklapenaren alde saio bat gauzatu da, 800 pertsona inguruko partaidetzarekin.
Galdakaon, udalerriko postontzi guztietan 2017ko “Birziklatu zalantzarik gabe” egutegia banatu da.
Sasieta Mankomunitatea osatzen duten udalerrietan “Hondakinak Kitto!” ingurumen heziketa kanpaina gauzatzen ari da, Lehen eta Bigarren Hezkuntzako ikastetxeei zuzendutakoa eta parte hartzaile bikaina izaten ari dena.
Uzt 27, 2016 | Ingurumen hezkuntza
Nola bizi ziren duela 27.000 urteko gizakiak? Horixe ikusi ahal izango dute uztailaren 30 edo abuztuaren 21ean Aizpitarteko koben erraiak ezagutzera animatzen direnek. Esperientzia liluragarri honetan, kobako pasabide eta galeria zoragarrietan barrena, gidari apartak izango ditugu. Felix Ugarte Espeleologia taldeko adituen eta Jesus Tapia arkeologoaren eskutik, lur azpiko eremu zoragarria ezagutuko dugu. Informazio gehiago.
Uda honetan ere, Aiako Harria natur eremua ezagutzera emateko eta balioztatzeko jarduerak prestatu ditugu Listorretan. Historiaurreko bizimoduarekin jarraituz, “Aizpitarteko lehen gizakiak, Historiaurreko bizimoduak” erakustaldi eta tailerrak eskainiko dira abuztuaren 13an Aizpitarteko Lagunak taldearen eskutik. Abuztuaren 5ean aldiz, hegan egiteko gai den ugaztun bakarraren ezaugarriak gertutik ezagutzeko aukera paregabea izango da Kiko Alvarez adituak gidatuko duen “Saguzarrak hurbiletik” irteeran.
Informazio gehiago: 943 49 50 69 edo arditurri@gipuzkoamendizmendi.net
Uzt 27, 2016 | Ingurumen hezkuntza
Gipuzkoako Parketxe Sarea osatzen duten parketxeek, Gipuzkoako Natura Parkeetako natura eta kultur-ondarearen erakusleak dira. Uda honetan aukera paregabea duzu bertaratzeko!
- Arditurriko Parketxea, mendeetako historia duten meategiak
Aiako Harriko Natura Parkeak, bai lurrazalean zein lurraren azpian, balio handiko ondarea jasotzen du, eta hura ezagutaraztea helburu duten ekintzak eskaintzen dira. Horiek, erromatarren garaiko meatzeak bisitatuz, monumentu megalitikoen magia sentituz edo pagamotzen itxura bereziaren zergatiaz jabetuz garatuko dira. Informazio gehiago.
- Anduetza Parketxea, egurraren etxea
Zegamako Anduetza baserrian kokaturik, Aizkorriren magalean, Aizkorri-Aratz Natura Parkearen aberastasun natural eta kulturalaz gozatzeko leku paregabea da. Parketxeak, mendeetan zehar naturaren eta gizakiaren arteko elkarbizitzaren ondorioz sortutako paisaia kulturala erakusten du. Eraikinaren erraietara jaitsiz, bisitariak baso berezia aurkituko du bertan, mundu osoko 173 zuhaitz espezie ezberdinez osatutako enbor bildumarekin egingo du topo eta. Horren osagarri, Imanol Artolaren mundu osoko beste 1.500 bat egur lagin ezberdinez osatutako xiloteka. Informazio gehiago.
- Lizarrusti-Barandiaran Parketxe Hedatua, natura eta historia elkarturik
Aralarko Parke Naturalak jasotzen duen natur- eta kultura-ondarea oinarri, ingurunearen ezaugarriak eta bertan erroturiko gizakien arteko erlazioa azpimarratuko duten ekintzak burutzen dira. Horiek, Barandiaran Museoan, Lizarrustiko Parketxean eta gidaturiko tailer edo ibilaldietan zehar garatzen dira. Informazio gehiago.
Uzt 27, 2016 | Hondakinak, Ingurumen hezkuntza
Uztaileko lehenengo hamabostaldian, aurrez Donostiako Easo plazan arrakasta izan ondoren, Birziklabirintoa Garbera Merkatal Zentrora eraman zen, bertan, plastikozko ontziak, beirazko ontziak eta paper eta kartoizko ontziak zuzen bereizteko nozioak nonahi zabaldu zirelarik. Beste behin ere, oso arrakastatsua izan da eta hiritarrek oso harrera ona egin diote, izan ere, 18.000 bisitaritik gora jaso ditu.
Kanpaina, Garbera Merkatal Zentroaz gain, San Marko Mankomunitatea, Ecovidrio eta Ecoembes-ek babestu dute eta oraingoan ere, Bera-Bera eskubaloi talde izan da kanpainaren irudia.
Uzt 4, 2016 | Hondakinak, Ingurumen hezkuntza
Donostiako Easo Plazan izandako arrakastaren ondoren, Birziklabirintoa Garbera Merkatal Zentrora eraman da, bertaratzen direnei birziklapenaren inguruko zalantzak argitu eta ingurumenaren zainketaren inguruko ezagutza zabaltzeko. Kanpaina hau, Garbera Merkatal Zentroaz gain, San Marko Mankomunitatea, Ecovidrio eta Ecoembes-ek babesten dute eta oraingoan ere, Bera-Bera eskubaloi taldea izango da kanpainaren irudia.
Egurrezko palet eta birziklatutako materialekin egindako labirinto bitxi honek, hondakinen gaikako bereizketa egokia bultzatu nahi du. Horretarako zirkuituan jendearen arreta deitzeko elementu ugari kokatu dira, plastikozko ontziak, beirazko ontziak eta paper eta kartoizko ontziak zuzen bereizteko nozioak nonahi zabaltzen direlarik.
Birziklabirintoa Garbera Merkatal Zentroan izango da uztailaren 1etik 16ra astelehenetik ostiralera 17:00etatik 21:00etara eta larunbatetan goizeko 11:00etatik 14:00etara eta arratsaldeko 17:00etatik 21:00etara.
Uzt 4, 2016 | Hondakinak, Ingurumen hezkuntza
Ikasturte honetan guztira 4 tona biohondakin konpost bihurtu dute ZiSare programan parte hartzen duten Behe Bidasoa eta Urolako Kostako ikastetxeetan. Programa honek hondakinen murrizketan sentsibilizatzea du helburu, ikuspuntu didaktikoa ahaztu gabe. Gipuzkoako Foru Aldundia eta Artelatz Ingurumen Zerbitzuak enpresaren laguntzaz, Urola Kosta eta Txingudiko mankomunitateek ikastetxeetan biohondakinak konpostajearen bidez kudeatzeko sistema martxan jartzeko aukera eskaini dute.
ZiSare programak 2014-2015 ikasturtean eman zituen bere lehen urratsak, Urola Kostako 6 ikastetxeetan ezarri zenean. Ikasturte honetan, bigarren edizioan, Urola Kostako 9 ikastetxek hartu dute parte eta programa Behe Bidasoan ere ezarri da, Irun eta Hondarribiko 5 ikastetxe parte hartzen ari direlarik. Horrela, guztira 1.100 ikasle inguru ari dira zuzenki hondakinen prebentzioa oinarritzat duen programa honetan parte hartzen.
Ikasturte honetan guztira 4.345 kg biohondakin murriztu dira ZiSare programaren bitartez. Konpostagailuetara isuritako %77a, ikastetxeko jangeletan sortutako hondakin sukaldatuak izan dira eta %23a, sukaldatu gabekoak. Datuak benetan positiboak dira eta urtetik urtera kopuru hori handituz joango da ziur.
