Mai 25, 2018 | Biodibertsitatea, Ingurumen hezkuntza
Maiatzaren 25etik 27ra burutuko den Zegama-Aizkorri Maratoia gaur egun Natur guneetan elkarbizi diren jarduera ezberdinen erakusgarri da, kasu honetan goi mailako kirolarekin lotura duena. Baina beste hainbat altxor ere gordetzen dira Aizkorri mendizerraren magalean.
Maratoiaren aitzakian jende andana hurbilduko da Aizkorpe bailarara eta aurten ere Aizkorri-Aratz Natura Parkean dagoen Anduetza Parketxeak ateak zabalik izango ditu, maratoiaz gain, inguruan aurkituko duen aukera turistiko zabalaz eta denentzako egokitutako ibilbideetan laguntzeko prest.
Hau horrela, Anduetza Parketxeak gonbidapena luzatzen dio Egunotan Zegamatik pasako den bisitari orori, Aizkorri-Aratzen ezkutatzen diren altxor guztiak ezagutzeko. Bertan antzinako basoen kudeaketa sistema, mundu osoko egur laginak biltzen dituen xiloteka eta enborren erakusketa, San Adriango igarobidean egindako aurkikuntzak eta beste hainbat gauza gertutik ezagutu ahal izango dituzte gerturatzen direnek.
Maratoiaren inguruko informazio gehiagorako: www.zegama-aizkorri.com/eu/
Mai 25, 2018 | Hondakinak, Ingurumen hezkuntza
“Iritsi da Bioterra, Udako festa ekologikoa! Horrela aurkezten da Bioterra 2018. Produktu ekologikoak, bioeraikuntza, energia berriztagarriak eta kontsumo arduratsuari buruzko azoka antolatuko da FICOBAn ekainaren 1, 2 eta 3an. Bertan, Artelatz Ingurumen Zerbitzuak SL-k EXPORETRETE erakusketa ibiltaria, gaur egungoa eta parte-hartzailea, kudeatuko du Txingudiko Zerbitzuak-en eskutik eta helburua herritarrek saneamendu-sarearen kontsumo arduratsu bat egitea da.
6 gune desberdin dituen 55 metro koadroko iglu txuri bat da. Bertan, toallita hezeen gunea, komun-ontzia eta bertatik botatzen diren hondakinen gunea, kutsatzaile emergenteen panelaren gunea, koipe eta olioak ematen dituzten arazoak azaltzen duen espazioa eta azkenik, materia organikoaren isurketek saneamendu-sarean eragiten dituzten arazoen txokoa daude. Bideoak, jolasak eta elkarrekintzarako objektuek bisita atsegina, argigarria eta bitxia egiten dute.
Mai 25, 2018 | Hondakinak, Ingurumen hezkuntza
Bermeoko Udalak, Ecovidriorekin batera, herrian gehiago eta hobeto birziklatzeko, komunikazio kanpaina pertsonalizatu bat jarri zuen martxan. Ostalari guztiek beirazko ontziak modu arduratsu eta egoki batean sailkatzera animatuz eta dagozkien edukiontzi berdean uzteko asmotan.
Ingurumen hezitzaile bat izan zen establezimendu guztiak bisitatzen maiatzaren 14tik 18ra bitartean. Beraien parte hartzeak beiraren birziklapenaren zikloan duen garrantzia gogorarazteko, honek dituen ingurumen onurak adierazteko eta edukiontzi berdean zer utzi daitekeen eta zer ez azaltzeko.
Beirazko ontziak igluraino eramateko kuborik ez zuten ostalariei, aukera eman zitzaien 40 litroko edo 90 litroko (ale-hop) kuboak eskatzeko. Guztira 90 litroko 21 kubo banatu ziren eta 40 litroko 11 kubo.
Ots 28, 2018 | Hondakinak, Ingurumen hezkuntza
Aurten ere, Bilboko Udalak, Ecovidriok eta Ecoembesek Derrigorrezko Bigarren Hezkuntza eta Lanbide Heziketako ikastetxeei zuzenduriko birziklapen kanpaina abian jarri dute.
Urriak 19 eta 26an, kanpainaren aurkezpena egin zen Bilboko Ingurugelan (Eskolako Agenda 21 programan parte hartzen duten ikastetxeei) baita Bilboko Berritzegunean ere (Bigarren Hezkuntzako eta Lanbide Heziketako ikastetxeetako zuzendariei). Kanpaina honen bigarren edizioa da eta 16-18 urteko neska-mutilak birziklatzearen arloan sentsibilizatzeko eta gaiaz jabearazteko jarri da abian, otsailaren 5etik martxoaren 31ra bitartean luzatuko delarik. Bilboko 32 ikastetxek parte hartuko du, guztira, 1.600dik gora neska-mutil izango dira etxeko hondakinak birziklatzeari buruzko edukiak aztertzen. Halaber, 1.800 iman banatuko dira etxera eramateko, errealitate areagotuarekin. Iman horiek kanpainako hiru edukiontziei (beira, ontziak eta kartoia eta papera) buruzko informazio orokorra daukate, etxean hondakinak bereiztea zein garrantzitsua den konturatu daitezen. Iaz ebaluazioan puntuazio ona jaso zuen kanpainak, azken nota 8,5 izan baitzen eta, besteak beste, arrazoi horregatik kanpaina bultzatzen duten erakundeek beraien indarrak batu dituzte, birziklatze-tasa hobetzeko eta etxean eta eguneroko bizimoduan birziklatzea zein garrantzitsua den ohartarazteko.
Ots 28, 2018 | Hondakinak, Ingurumen hezkuntza
Hondakinekin egindako egitura bereziak Tolosaldeko herrietan ikusgai
Tolosaldeko Mankomunitateak Ecovidrio eta Ecoembes erakundeen laguntzarekin antolatu duen sentsibilizazio kanpaina berri honek herritarrei laguntza eskaini nahi die informazio zehatza eta deigarria esku-eskura jarriz. Horretarako, nola birziklatu argi azalduko duten informazio egitura berezi batzuk jarriko dira eskualdeko 20 herritan. Zurezko paletak berrerabiliz eginiko egitura berezi horietan birziklapen-lerro ezberdinetan bereiztuta jaso behar diren benetako hondakinak jarri dira erakusgai eta baita informazio panelak ere.
2017an etxeetako hondakinen gaikako bilketaren bataz bestekoa %62,30era iritsi da. Hala eta guztiz ere, badago zer hobetua eta horixe da xedea, hau da, gehiago eta hobeto birziklatzea.
20 herri 23 astetan
Urtarrilaren 10ean hasitako ekimenak hogei herritan jarriko dira egiturak ikusgai, Tolosako kasuan hiru auzoetan. Kanpaina honetan, herri txikiek izango dute protagonismoa.
Bilketa puntuen kopuruaren arabera, iraupen ezberdinez egongo dira herri bakoitzean, bi aste eta lau asteren artean.
Aste honetan eta hurrengoan Tolosako Bedaio auzoan, Adunan eta Lizartzan izango dira ikusgai.
Egutegi osoa ikusteko: http://www.tolosaldekomankomunitatea.eus/euskara/albisteak/birziklapena-sustatzeko-totemak
Ots 28, 2018 | Ingurumen hezkuntza
Urtea ondo hasteko, Artelatzek kudeatzen dituen Aralar, Anduetza eta Aditurriko Parketxeen eskutik gure lurraldeko hiru baserri desberdinetara bisitak antolatu dira bertako lana eta bizimodua gertuagotik ezagutzeko helburuarekin, lehen sektorea balioan jarriz eta gure kultur paisaiekin duten lotura zuzena ulertuz.
Bisitak oso arrakastatsuak izaten ari dira eta familian egiteko oso egokiak. Bertan, baserrietako instalakuntza desberdinak ikusten dira, bertako produktuak dastatzeko aukera egoten da eta txikienek baserriko animaliekin kontaktu zuzenaz gozatzen dute.
Hauek dira bisitatzen diren baserriak: Ondarre Gaztandegia (Segura) Zegamako Anduetza Parketxearen eskutik, Iztueta Baserria (Lazkaomendi) Aralarko Parketxearen kasuan, eta Adarrazpi Gaztandegia (Urnieta) Arditurri Parketxearen bitartez. Urte sasoiaren arabera Aralar eta Aizkorriko larreetan edota baserrietan aurki daitezke animaliak. Bi gaztandegietan ardiak eta beraien arkumeak dira protagonista eta bietan gazta desberdinak dastatzeko aukera dago. Iztueta baserriaren kasuan, behiak dira erreginak eta beraien esne goxoarekin egindako jogurt eta izozkiak dastatu daitezke.
