Ikastetxeetan BIRZIKLATU!-¡RECICLA! kanpaina garatzen ari gara berriro, etxeetan hiri-hondakinak birziklatzearen garrantziaz ohartarazteko

Ikastetxeetan BIRZIKLATU!-¡RECICLA! kanpaina garatzen ari gara berriro, etxeetan hiri-hondakinak birziklatzearen garrantziaz ohartarazteko

Aurten ere, Bilboko Udalak, Ecovidriok eta Ecoembesek Derrigorrezko Bigarren Hezkuntza eta Lanbide Heziketako ikastetxeei zuzenduriko birziklapen kanpaina abian jarri dute.

Urriak 19 eta 26an, kanpainaren aurkezpena egin zen Bilboko Ingurugelan (Eskolako Agenda 21 programan parte hartzen duten ikastetxeei) baita Bilboko Berritzegunean ere (Bigarren Hezkuntzako eta Lanbide Heziketako ikastetxeetako zuzendariei). Kanpaina honen bigarren edizioa da eta 16-18 urteko neska-mutilak birziklatzearen arloan sentsibilizatzeko eta gaiaz jabearazteko jarri da abian, otsailaren 5etik martxoaren 31ra bitartean luzatuko delarik. Bilboko 32 ikastetxek parte hartuko du, guztira, 1.600dik gora neska-mutil izango dira etxeko hondakinak birziklatzeari buruzko edukiak aztertzen. Halaber, 1.800 iman banatuko dira etxera eramateko, errealitate areagotuarekin. Iman horiek kanpainako hiru edukiontziei (beira, ontziak eta kartoia eta papera) buruzko informazio orokorra daukate, etxean hondakinak bereiztea zein garrantzitsua den konturatu daitezen. Iaz ebaluazioan puntuazio ona jaso zuen kanpainak, azken nota 8,5 izan baitzen eta, besteak beste, arrazoi horregatik kanpaina bultzatzen duten erakundeek beraien indarrak batu dituzte, birziklatze-tasa hobetzeko eta etxean eta eguneroko bizimoduan birziklatzea zein garrantzitsua den ohartarazteko.

Birziklapena sustatzeko totemak

Birziklapena sustatzeko totemak

Hondakinekin egindako egitura bereziak Tolosaldeko herrietan ikusgai

Tolosaldeko Mankomunitateak Ecovidrio eta Ecoembes erakundeen laguntzarekin antolatu duen sentsibilizazio kanpaina berri honek herritarrei laguntza eskaini nahi die informazio zehatza eta deigarria esku-eskura jarriz. Horretarako, nola birziklatu argi azalduko duten informazio egitura berezi batzuk jarriko dira eskualdeko 20 herritan. Zurezko paletak berrerabiliz eginiko egitura berezi horietan birziklapen-lerro ezberdinetan bereiztuta jaso behar diren benetako hondakinak jarri dira erakusgai eta baita informazio panelak ere.
2017an etxeetako hondakinen gaikako bilketaren bataz bestekoa %62,30era iritsi da. Hala eta guztiz ere, badago zer hobetua eta horixe da xedea, hau da, gehiago eta hobeto birziklatzea.

20 herri 23 astetan
Urtarrilaren 10ean hasitako ekimenak hogei herritan jarriko dira egiturak ikusgai, Tolosako kasuan hiru auzoetan. Kanpaina honetan, herri txikiek izango dute protagonismoa.
Bilketa puntuen kopuruaren arabera, iraupen ezberdinez egongo dira herri bakoitzean, bi aste eta lau asteren artean.
Aste honetan eta hurrengoan Tolosako Bedaio auzoan, Adunan eta Lizartzan izango dira ikusgai.
Egutegi osoa ikusteko: http://www.tolosaldekomankomunitatea.eus/euskara/albisteak/birziklapena-sustatzeko-totemak

Birziklatu zalantzarik gabe Gasteizen

Birziklatu zalantzarik gabe Gasteizen

Abenduaren 19tik 29ra Gasteizko lau zentro zibikotan ibiliko gara hiri-hondakinen birziklapena sustatzeko instalazio batekin. Gasteizko Udala eta Ecoembes erakundeen eskutik, edukiontzi horian bildu beharreko hondakinen erakusketa bat izango da ikusgai eta Hondakinen erruletarekin jolas egiteko aukera izango da: egokitzen den hondakina non utzi behar den asmatzea da jolasa. Bi ingurumen-hezitzaile egongo dira saioa dinamizatzen eta herritarrei informazioa ematen, izan ditzaketen zalantzak argituz. Parte hartzen duten guztien artean bertako elikagaiez betetako saski bana zozketatuko da zentro guztietan. Informazio euskarri bat ere banatzen zaiei herritarrei. Zatoz jolastuz ikastera!

-Abenduak 19, 20: Iparralde zentro zibikoa

-Abenduak 21, 22: Salburua zentro zibikoa

-Abenduak 26, 27: Ibaiondo zentro zibikoa

-Abenduak 28, 29: Zabalgana zentro zibikoa

Ordutegia: 16:30-20:30

Eguberrietako haur parkeetan, beste urtez batez

Eguberrietako haur parkeetan, beste urtez batez

Aisialdiko denbora une aproposa da haurren arreta gureganatzeko eta hondakinen birzklapenaz ikasteko, ondo pasatzen duten bitartean. Horixe da helburua, hain zuzen ere. Aurten, Irungo Ficoba erakustazokan ospatuko den Txingudiko Eguberrietako Haur Parkean, Superheroien dameroaren gunea zabalik izango da Txingudiko Zerbitzuak erakundearen eskutik, nahi duen guztiekin jolasteko: familiak, gurasoak, haurrak… guztiak elkarrekin, jolas giro atsegin eta familiarrean. Aurreko urteetan bezela, 6.000 pertsona ingururekin partekatu nahi genuke esperientzia.

Bestalde, Donostiako Kursaal jauregiko Eguberrietako Haur Parkean ere ibiliko gara, ECOVIDRIOren gunea dinamizatzen. Bertan, iglu berdean zer hondakin utzi behar diren eta zeintzuk ez ikasteko aukera egongo da, jarduera dibertigarrien bitartez: tailerrak, photocalla, jolasak… bertaratzen diren guztien gozagarri gertatuz, haur eta gaztetxoena bereziki.

BIRZIKAR-KAR-KAR-KETAREN MONOLOGOAK

BIRZIKAR-KAR-KAR-KETAREN MONOLOGOAK

Txingudiko Zerbitzuak, Ecoembesen eta Ecovidrioren eskutik, hondakinen gaikako bilketaren inguruko sentsibilizazio kanpaina berritzaile eta dibertigarria antolatu du azaroan zehar. Kanpainaren oinarria, monologo komikoen artea ohiko mezua zabaltzeko erabiltzea izan da: gehiago eta hobeto birziklatzea.

Monologoak bi eszenategi ezberdinetan garatu dira: tabernak eta FICOBA erakustazokako auditorioma. Hiru ostiral eta beste horrenbeste larunbatetan zehar bertako monologari Behe-Bidasoako 12 ostalaritza-establezimendutan izan dira, hurbildutako jendetzari farre algarak eraginez. Kanpaina amaitzeko ikuskizun berezia antolatu zen FICOBAko auditoriumean abenduaren 3an. Bertan, Txabi Franquesa umoregile ezagunak beste hainbat monologariekin batera, ikuskizun aparta eskaini zuten, bertaratuak farrez leher araziz; programatu ziren bi saioetarako sarrerak agortu egin ziren.

“Hondakinak kitto” programa abian da Sasieta Mankomunitatearen eskutik

“Hondakinak kitto” programa abian da Sasieta Mankomunitatearen eskutik

30 ikastetxeetako 72 ikastalde eta 1.400 ikasle inguruk hartuko dute parte.

Azaroaren 6an eman zitzaion hasiera Sasieta Mankomunitateak Goierriko eta Urola Garaiko Lehen eta Bigarren Hezkuntzako ikastetxeei zuzendutako “Hondakinak kitto”  ingurumen-hezkuntza programari. Seigarren edizioa izango da eta Makomunitatearen eremuko udalerrietako ikastetxeetan garatuko da abenduaren 19a bitartean.

Ikasleei zein irakasleei zuzendutako kanpaina honen helburu nagusiak hondakin gutxiago sortzearen garrantziaz ohartaraztea, berrerabilera sustatzea eta birziklatzean sakontzea dira; azken atal horretan, edukiontzi horian biltzen diren hondakinen gaikako bilketa azpimarratuz, zalantza gehien sortzen dituen lerroa baita.

Artelatzeko ingurumen-hezitzaile adituen eskutik Lehen Hezkuntzako ikastaldeekin bi saio egin dira, informazioa emateaz gain jolasen bidez landuz. Bigarren Hezkuntzakoekin kontsumoa eta hondakinen sorreraren arteko loturan sakontzen da gazteen ikuspegitik.

Beiraren birziklatzea indartzeko ekimen osagarriak

Halaber, Sasieta Mankomunitateak Ecovidrio erakundearekin batera beste bi ekimen garatuko ditu. Lehena, azaroan garatu genuen; ingurumen-hezitzaile bikote bat ibili da hainbat udalerrietako kaleetan triziklo berezi batzuen laguntzaz beirazko ontziak gehiago eta hobeto birziklatzeko informazioa zabaltzen herritarren artean. Sei udalerrietan izan dira: Lazkao, Beasain, Ordizia, Urretxu, Legazpi eta Zumarragan.

Bestalde, Beasain, Urretxu eta Zumarragan kanpaina berezia egin dugu ostalaritzako sektorean beirazko ontzien birziklatzea sustatzeko. Establezimendu guztiak bisitatu dira, informazioa emanaz eta gaika biltzeko baliabide materialak eskainiz.